زي ما هتدخل زي ما هتطلع ..
لو مش فاضي شوف حاجة افيد تقراها
------------------------------------------

السبت، 19 ديسمبر، 2015

قوما غيركم !

"يستبدل قوما غيركم"

امي ربنا يخليهالي كانت اما بتتفرج علي الناس في الحج او تنزل مرة معايا القاهرة كانت تقول كلمة غريبة قوي (ربنا قد اية عظيم .. ربنا هيحاسب كل دووول .. سبحانك يارب) .. 

حقيقي محدش كتير بيفكر في النقطة دي .. انا كنت بسافر قطر مميز في اعدادي .. كنت بعدي علي مراكز غريبة في الطريق من لسوهاج .. وكنت ببص من الشباك واقول في نفسي "كل دي بيوت .. !؟ يا تري ورا كل شباك من دول بني ادم .. وله قصة .. وله اهداف وكدة .. يا تري ربنا بيستجيب لواحد واحد من دول لو دعاه .. وعارف نيته وهدفه و..و.. وكدة !؟" .. نفس الحكاية كانت عندي اوائل ما كنت بنزل القاهرة كتير ايام الكلية .. كنت ببص في وش الناس .. يا تري ورا كل واحد قصة !؟ هموم ومشاكل .. حاجات ميعرفهاش حد غيره هو بينه وبين ربنا وبس !؟

ساعات اما كنت ببقي مخنوق بفتح الموقع بتاع محطة الفضاء الدولية .. اللي بتعرضlive view للارض 24 ساعة .. وبتعدي ع مصر وكدة .. واشوف قد اية الدنيا دي كبيرة وواسعة .. معرفش دا كان بيوصلي اية بالظبط ..هل بيوصلي ان الدنيا اكبر بكتير من المشاكل اللي عندي .. ولا افتكر ان ربنا عظيم قد اية لانه خلق كل دا وبيتكفل بيه واجي عندي انا واقول انا فيا حاجة غلط او ربنا سابني .. معرفش بس هو شعور كل بيتلغبط في بعضه .. بيخلي الواحد يطلع بانه عنده شعور بانه ربنا كبير وتوكل عليه والاهم .. راحة .. وان شيلة الهم مش جايبه همها ..



"ان تتولوا يستبدل قوما غيركم" دي للمسلمين .. وللامم قبلنا "بل انتم بشر ممن خلق" .. في مصطلح جديد عرفته جايز متاخر .. الايجو !! لما اترسخ فيا ان الفكرة اللي انت بتفكر فيها في علي الاقل الف بيفكر فيها زيك في نفس الوقت .. وان اللي بتعمله في ملايين بيعمله .. وان حتي العظماء بتوع الوقت الحالي ممكن يتنسوا مع الزمن.. وان في عظماء حتي طلع ان اغلب مجهودهم وكلامهم غلط .. في ناس عظيمة ماتت ومحدش اكتشف قيمتها غير بعد ما ماتوا .. في متغيرات كتير .. لان دي ببساطة الدنيا !! فعليا .. 

مفيش حاجة لو بصينالها من بُعدين .. بعد الزمان والمكان .. مفيش حاجة عظيمة .. مفيش حاجة متعملش زيها ومش هيتعمل احسن منها .. مفيش حاجة هي point of interest في الدنيا دي .. وكمان كان في فيديو تاني بيجيب مكان الارض من الكون ( او الجزء المكتشف منه حاليا) والمجرات والنجوم .. هتكتشف منه بقي ان كل دا .. ولا حاجة .. حرفيا وفعليا ولا حاجة .. لا في بعد الزمان ولا المكان ..

حرفيا "لا تساوي جناح بعوضة" .. دا مش حاجة بقولها لنفسي عشان اصبر نفسي .. انا الحمد لله نفسيا في حالة كويسة ومش بمر بظروف صعبة .. لكن دا عشان بس افكر نفسي انه لكل حاجة حدود .. وان مهما حصل مفيش حاجة كاملة .. واننا بنتحاسب علي سعينا في الارض واننا مكلفين باننا نهاجر في ارض الله الواسعة عشان نفهم اكتر المبدا دا .. 

حقيقي اول مرة افهم فكرة مستضعفين في الارض وربطها بالهجرة من الناحية دي .. 

في الاخر احب اهني نفسي واقول .. " الحمد لله ع نعمة الكتابة .. مبروك اني رجعت اكتب تاني"


 ----------
links : 
www.ibda3world.com/بث-مباشر-ناسا-محطة-فضائية/

السبت، 12 ديسمبر، 2015

سر !!

to be read while listening to this track 

----------------

ممممممم
يوم عن يوم بيفرق مع الواحد ..
حقيقي .. الاهم اني عايز اعيش وكل يوم فعليا يفرق عن اللي قبله .. ويضيف .. وماكونش مجرد شخص مستني الاجازة عشان اكسر روتين يومي .. ولا كل يوم زي اللي قبله ولا اهي عيشة وخلاص .. 

ولان دا مش سهل في احيان كتير .. انا قررت اني ادور علي الطريقة اللي اوصل بيها لدا .. مممممممم .. ساعات بحس ان الكتابة مش كفاية عشان اعبر عن اللي عايز اقوله .. زي ما ساعات كتير الواحد بيقف بين ايدين ربنا ومش عارف يدعي باية .. من كتر ما كل حاجة متلغبطة جوة .. 

في دعوة فاكرها كويس قوي .. دعيت اني لو مش هوصل للي انا عايز اني اموت شهيد ...وموتة تكون مؤثرة في ناس كتير .. ع الاقل يبقي لو مش مكتوبلي اني اعيش عشان حاجة يبقي اموت عشان حاجة .. 

انا مانكرش اني عشت شهور وجايز سنين حابس نفسي جوة حدود حلمي اللي عايز اوصله .. بمعني بفكر دايما يا تري اية اللي هيوصلني وازاي والمفروض اعمل اية وانا ف السن دا .. وفي الاخر تعبت .. وكل خبطة كنت تيجيلي كنت باخدها علي دماغي بالقوي .. وبتخليني اتهز جدا .. اللي هو انا يحصلي كدة لية .. وازاي وبتاع .. 

حقيقة انا نسيت نفسي .. انا بشر .. بشر ممن خلق .. انا مكنتش شايف نفسي ولكن جايز كنت حاطط لنفسي صورة خيالية وطريق عايز امشي عليه بالمللي رغم كل الظروف ..  عارف ارتحت امتي ياد يا مصطفي (بما انك الوحيد اللي بتكتب اللي بتقراه دا) .. ارتحت اما قريت وفهمت معني (لا يكلف الله نفسا الا وسعها) .. اه تاني وتالت .. انا مش مكلف باني اوصل .. انا عليا امشي وانجح في كل الامتحانات اللي بتحط فيها مش اكتر .. اسعي .. لكن وسعي مكتوب ومحدد .. (وان ليس للانسان الا ما سعى) .. وصلت الحمد لله .. ماوصلتش يبقي اية !؟ لا .. مقولش نصيب .. يبقي افضل احاول لحد اخر نفس .. او لحد ما ربنا يستجيب الدعوة اياها .. 

تعرف انا دعيت الدعوة دي بعد تفكير لكذا يوم ..حسيت اني بكتب تعهد واقرار قبل ما انطقها .. وفاكر كويس دعيتها فين وقولت اية بالنص .. جايز دي من اصدق الدعوات اللي دعيتها في حياتي .. عموما اللي عايز اقوله اني بعد كدة وصلت لقناعة اني هعيش زي ما انا عايز .. وهعمل كل حاجة نفسي فيها ما دام متاحة ليا وفي وقت .. من ساعتها بقيت انزل اكل في مطاعم واجرب كل يوم مطعم في القاهرة وبقيت استمتع بالسفر تاني ويقيت اعمل اللي انا عايزه وارقص علي اغاني شعبي قدام ناس كتير اعرفهم عادي (مش حاجة حلوة بس كان نفسي اعملها من زمان بصراحة :D ) .. بقيت اتبسط وانا بسيب شغل او يتلغي لي شغل تاني بالتليفون او تحصلي اي حاجة .. وبقيت سايبها ع ربنا والرزق بيجي والله في الاخر .. 

خلاص معدش في المبدأ بتاع ان دي فيها الخير خلاص ولازم دي واتحسر لو ضاعت عليا وبتاع .. معدش فيه بقي اني لازم اعمل كذا وماعملش كذا عشان فلان .. وبعمل اللي يرتحاله ضميري ويرضي ربنا وبس .. 

مممممممم .. في الاخر هل دا صح !؟ يعني ساعات بخاف الموضوع يقلب بأني ابقي بلاستيك مثلا :D مفيش حاجة بتأثر فيا .. جايز.  لية لاء .. !؟ بس والله اديني بجرب .. وع الاقل الموضوع دا ساعدني كتير جدا اني اعدي مرحلة صعبة جدا في الفترة الاخيرة .. فانا حتي الان مرتاح جدا علي الموضوع دا .. وبحاول اركز علي جوانب القصور التاني عندي .. وهكذا وهكذا بقي لحد ما ربك يفرجها من عنده واوصل .. 


شكرا ليا علي وقتي الغالي واتمني مكونش عطلتني :) 

السبت، 31 أكتوبر، 2015

بعد سنة !!

To be read while listening to this Track

اية اللي حصل !؟
امبارح افتكرت حاجة غريبة جدا ..
اني كنت حاطط الصور اللي صورتها فوق سريري في السكن .. وعلي الدولاب كنت حاطط جمل كتير من كتاب قريته وجملتين طبعتهم مخصوص من النت ..





لك شئ في هذا العالم فقم

و
Everything happens for a reason  


بعد ما خلصت الكلية ودخلت امتياز ونقلت سكن جديد ..
مانقلتش معايا الجمل دي .. نقلت معايا الصور بس ..

ثواني ..
هنا اكتشفت حاجة ..
وانا بدور علي اللاب بتاعي عن الصور دي .. نسيت ..
نسيت ان كان في كلمة تالتة .. وهي



"وتوكل علي الله .. وكفى بالله وكيلا"

كنت طابعها ونسيت اصلا اني كنت حاططها .. واما افتكرت امبارح .. ماجتش في بالي الاية دي ..
دا بالنسبة لي بيفسر كتير ..
بيفسر قد اية انا بعيد ..
وانا لازم اعترف بدا ..

انا كنت داخل هنا عشان اتكلم عن اني لما نقلت امتياز نقلت الصور بس من غير الكلام ..
فبقي التصوير بس اللي في اهتمامي عشان كل يوم قدامي .. والكلام اما راح ..
راح هدفي اللي كل يوم كنت تقريبا بفكر نفسي بيه رغم انه لسة مش مكتمل الملامح ..
بس للاسف انا نسيت اني كنت بتوكل علي الله برده .. !!

اما انا هنا في القاهرة لا نقلت الصور ولا الكلام ..
واما افتكرت حتى وانا بدور علي حاجات كتير ابدا منها اصلح من نفسي
ما فتكرتش حتى الاية !!
مابقاش قدامي ولا هدف ولا معني ولا حتي متعة للتصوير !!

انا مش عشان نسيت احط الصور فبالتالي مابقتش احب الصور !
انا مش عشان ماحطتش الكلام نسيت او مابقتش شغوف باللي عايز اوصله !
انا مانستش الاية عشان ليها فترة مش قدامي ..
انا عملت كل دا لاني اخترت ان كل دا مايبقاش ليه قيمة !!

حقيقة انا معرفش .. انا زهقت من كلمة معرفش اللي بكتبها في كل ال Notes  اللي ع الموبايل عندي
بس اللي عارفه ومتأكد منه اني انا اللي وصلت بنفسي للمرحلة دي ..
ماحدش غيري .. ومهما كانت الظروف .. كان ممكن ابقي احسن ..
وان شاء الله هبقي احسن ..

مش معني ان الواحد خسر ناس وحاجات كتير مادية ومعنوية ان الدنيا وقفت
انا لو كنت زارع معنى التوكل جوايا صح .. ماكنتش ابدا وصلت للمرحلة دي ..
انا لو كنت سايبها علي الله وهو بس اللي بيمدني بالعون وانا بدعي في كل صلاة "واياك نستعين"
مكنتش استنيت العون من فلان ولا فلانة ..

طبيعي هتأثر .. بس لازم اعرف انه مهما حصل لازم ماتخلاش عن اللي عايز اوصله
لان دا الشئ الوحيد اللي عايش عشانه وعايش ليه وعايش عشان احققه ..
مش فلوس مش شهرة مش حاجة ماحصلتش لمجرد انها ماحصلتش
مش أي حاجة والسلام !!

انا بكتب الكلام دا وانا عارف اني الوحيد اللي بقراه ..
بس بقراه عشان افكر نفسي كويس قوي قوي ..
افكر نفسي بكل لحظة عيشتها وانا بعيد .. وانا تايه .. عشان مارجعش هنا تاني ابدا ..

لان دا مش مكاني .. بعد سنة .. دا مش مكاني !!
او علي الاقل مش هرضي انه يكون ..