وحشاني قوي

وحشاني اوي المدونة بتاعتي .. ليا فترة كبيرة من كتر اللي فوق دماغي مكتبتش حاجة .
قريب هكتب فيكي ان شاء الله ..

من قلب جمهورية التحرير - الجزء التالت

بسم الله الرحمن الرحيم

بعد الجزئين اللي كتبتهم ( من قلب جمهورية التحرير )

الجزء الاول

http://keybordisy.blogspot.com/2011/02/blog-post.html

الجزء التاني

http://keybordisy.blogspot.com/2011/02/blog-post_17.html

اخترت دلوقتي اني اكمل وانا قطعت فترة ومكملتش علشان كنت معارض مبدأ اننا نفرح بالثورة وهيا لسة مخلصتش .. والحمد لله انه حق 400 شهيد مرحش هدر .. علشان كان حرام يكون ناتج الثورة في الاخر ( 7 شخصيات في السجن ووظيفة في وزارة المالية وشوارع نضيفة ومليانة شجر وورد !! )

يا فرحتي !!

عقبال امن الدولة وباقي الفساد ان شاء الله

نرجع للتحرير اللي نفسي ارجعلها تاني .. يمكن اللي مدايقني شوية اني روحت في اخر كام يوم اللي كانوا هاديين جدا .. ويعتبر معملتش حاجة يعني .. هناك شد انتباهي واحدة ست طيبة .. فكرتني جدا بوالدتي .. ام وربة منزل متخرجة من سنة 94 وحالها من حال اغلب المصريين .. مفيش شغل !! بس دا مكنش السبب اللي خلاها تبات في الميدان .. كانت قاعدة قريب من خيمة خليتني اعرف انها معتصمة من فترة .. قربت منها .. ومكسوف جدا اقولها اية !! اول ما جيت اتكلم معاها .. كانت بتكلمني بحذر .. لانه الحزب الوطني كان بيدخل ناس كتير يقولوا للي جوه التحرير ويناقشهم " مش كفاية كدة !! ادي مطالبكم اتحققت .. ادو الناس فرصة تشوف شغلها .. " والسمفونية المشروخة اللي زهقنا منها ومعرفش ازاي ناس صدقتها.. مش هيا هيا الحكومة الي قالت نفس الكلام !!

اول ما عرفت اني جاي علشان انقل رايها للناس برة واني مؤيد ليها وفي صفها سحبتني وخليتني اقعد جنبها .. طريقة كلامها الفلاحي الممدود وطبيعتها المريحة في الكلام خليت للست دي طابع خاص لكلامي معاها .. طبعا كالعادة محور السؤال بيكون .. لية الاصرار على الرحيل .. !! ودا كان الحوار ..

• بص يا ابني انا خريجة 94 لا شغل ولا حاجة .. مش مشكلة انا برده ست بيت ومش هاممني يعني .. مع اني قدمت كتير وفي كل حتة والله .. بس انتا عارف الوسايط بقى .. ومعايا بنت وولد .. والحكاية كلها في ابوهم المسكين
• ماله يا حاجة خير !!
• الراجل شغال في شركة حكومية في طنطا .. وفي مرة من كام سنة اتاخروا علي الموظفين في الحوافز 6 شهور .. راح جوزي وشوية اصحاب لية في الشغل عملوا اعتصام وقعدوا تحت الشركة لغاية ما ترجع حقوقهم وبعدين بقى مع الاضراب وكدة راحوا قالولهم خلاص هنديلكم حقوقكم .. بس ترجعوا الشغل تاني ..
• ورجعوا الفلوس .. ؟
• اه رجعوها في وقتها .. بس بعدها بشهرين راحوا ناقلين جوزي لاسكندرية .. ونقلوا كل واحد من زمايله فرع في محافظة علشان يفرقوهم .. وياريت كدة وبس .. دا كمان مفيش شهر تاني وكلهم اتفصلوا من الشغل ..!
• ازاي .. ازاي .. جوزك ومين تاني .. ؟
• جوزي وكل واحد اشترك في الاعتصام دا .. اتنقلوا من اماكنهم علشان ما يتلموش على بعض ويهدوهم شوية وبعدين فصلوهم كلهم .. ولما راح جوزي وصاحبه اشتكى في الشركة راح البوليس بهدلهم وقدامك اهو الراجل أ / محمد صاحب جوزي يحكيلك اتسحب على السلالم .. واضرب وكان هيموتوه !!
• لا حول ولا قوة الا بالله .. بس ثواني يا حاجة دلوقتي انا مقدر ظروفك وظروف جوزك .. بس مبارك اية دخله في الي حصلكم يعني .. ؟
• الله .. ازاي يعني .. ما هو كل ماشي بطريقة واحدة يا ابني .. اللي عملته الشركة مع جوزي هو اللي هتعمله الحكومة مع الشعب .. هيهدوهم وهيراضوهم .. وبعدين مش هتلاقي منهم حد ومن الشباب اللي زي الورد دا .. وبعدين هيورونا ايام سودة .. والله يا ابني هيا طريقة واحدة ماشية بيها البلد من اصغر مسئول لاكبر واحد فيها .. ولازم نثبت ونكمل لان دي فرصتنا الوحيدة علشان نرجع كرامتنا وكرامة ولادي !!!!!

( انا عن نفسي مصدقتش الرد دا !!)

• اتأثرتي يا حاجة بوائل غنيم .. ولا اية رايك فيه ؟
• وائل واد مصري محترم جدع .. زيه زي أي واحد هنا في الميدان .. الشباب كلهم فيهم بركة .. وانتو عملتوا اللي احنا مقدرناش نعمله واقل واجب نيجي نقف معاكم ونكفر سكوتنا السنين اللي فاتت دي كلها .. شباب واعي وفاهم والامل فيكم كبير ..

وفي الوقت دا عديت علينا واحدة ببلح وفطير توزعه علينا .. الحاجة اخدت منها واصرت انها تديني علشان يبقى بينا عيش وبلح على رايها .. وفي الاخر معرفتش اختم اقولها اية .. وكانت الحاجة الوحيدة اللي طلعت مني " كلمة اخيرة تقوليها اية ؟ "

بدات عنيها تدمع جدا .. وقالت : عندي امل كبير .. ابني وبنتي دول ذنبهم اية .. الناس دي كلها جات هنا لية .. وعود اية وبتاع اية بعد 30 سنة .. حرام بقى الناس عايزة تعيش .......

مقدرتش اخليها تكمل كلامها واضطريت اقاطعها واهديها شوية و حاولت اهزر معاها في الاخر يمكن امسح الهموم من على قلبها شوية زي ما هيا بتحاول تمسح الدموع اللي مليت عنيها في اخر كلامنا .. ست بسيطة جدا بشكلها .. بكلامها وبتلقائيتها .. لكنها كانت من اكتر الناس الي اثرت فيا في ميدان التحرير .. سبتها علشان اروح اقابل شخصية تانية .. خريج حقوق لكن ليه قصة غريبة جدا !

لقيته جنب الفيلا بتاعتنا .. قاعد بيقرا في الجرايد .. وبعد ما سلم الجرنال لاحظ وجود كلمة ( اكتب كلمة للثورة ) وطلب مني "الاجندة" الي بيكتبوا فيها .. وشدني جدا انه كتب " كان المفروض اسافر 5 فبراير لعقد عمل .. انا لغيت سفري .. لاني بلد احق بيا انا فخور اني مصري " سالته بعدها

• انتا فعلا كنت هتسافر يوم 5 فبراير !
• قالي اه .. في عقد عمل للسعودية .. ولغيته .. !
• لغيته .. !!
• انا حسبتها في دماغي .. قولت لو سافرت في الوقت دا هبقى خاين وسبت مصر في اكتر واقت مصر محتاجاني فيه .. وبعدين انا سألت نفسي سؤال انا هسافر لية ؟ .. علشان اخد فلوس بس كرامتي تتهان ؟ برة المصري ملوش قيمة بالنسبة لهم .. لا انا اقعد هنا ارجع كرامتي واطلب بحقي في بلدي اشرفلي ..

ردود زي دي اتعودت جدا اسمعها في التحرير .. مع اني لو سمعتها برة كان ممكن مصدقش ولا كلمة منها .. دا ما اذا مكنتش اتريقت عليها اصلا .. وبعدها عدى من قدام فيلتنا واحد ابيضاني كدة ونضيف .. وشكله بكاميرته كدة مدي على انه صحفي او مراسل محترم .. عرفت بعدين انه استرالي شغال في قناة بريطانية .. ودا بقى كان ليه معايا كلام تاني .. عوضا عن الكاميرا الخرافية اللي كان ماسكها واللي كانت شادة انتباهي جدا جدا .. كان سؤالي ليه بسيط على الاخر .. واتبدلت الادوار .. بحيث كنت انا اللي بسأل وهو اللي بيجاوب .. بس

How Do you Feel About What is going on in Egypt now ?

Not Really what I'm feeling .. But I could say People here Are Amazing People Honestly .. let me tell You Something .. I've been to Iraq war , Intefada , Sudan & I've coverd a lot of big stories all over the world .. but this is My Best Story Ever .. I've never seen this before .. You're really Great people deserving great country ..

Do You Know What Do we Call Tahrir Sq. ?? We call It The Republic Of Tahrir .. We Consider it a Small Republic represents the real Egyptians ..

ohh .. Republic Of Thrir .. Nice .. Very Well

وبدأ يكتب في النوتة بتاعته بقى .. وبدا المصريين يهزروا معاه وخصوصا اللي يعرفش انجليزي " هاو دو يو دو .. فاين سانكيو " " ليف موبارك .. ليف موبارك " " بقولك يا كابتن ما تاخدلي صورة .. فوتو فوتو .. علشان العيال في البيت بس .. خد .. خد يا كابتن " ..

منظر جميل جدا .. واهي حاجة بنتسلى فيها .. لغاية ما جي واحد وقف شوية قدام الفيلة وقالي " فيلا الشهيد مصطفى الصاوي " !! انتو تعرفوا مصطفى الصاوي ؟؟

يتبع .....

معلش كدة يبقى باقي اخر جزء .. الجزء الرابع :)

التحرير .. خارج الصندوق !!

" يا له من يوم هادئ " كالعادة جاءت هذه الكلمات في بالي وانا انظر من نافذة غرفتي .. لا ادري لماذا لا تبدو أي اثار للثورة في سوهاج .. الثورة في يومها التاسع .. لكني اشعر اننا في قارة اخرى .. حتى حظر التجوال لا اثر له هنا .. ولا أي بلطجي حتى ان شاء الله يسرق بيتنا !! ببساطة لا شئ .. كم كانت مصادفة ان اجد نفسي في التحرير في اليوم التالي .. يومان فقط قضيتهما هناك حتى سقط آملين ان لا يكون هناك "دور ثاني" !! .. يومان فقط .. لكني مستعد على الحلف بها ما تبقى من عمري .. قد فصلت كل ما رايت هناك في مذكرات لي على اربعة اجزاء ..  لكن حين فكرت في تلخيصها في مقالة بدا الامر صعبا .. ماذا علي ان اكتب ؟؟ هل اكرر كلاما قرأناه مائة مرة عن " مفيش كنتاكي .. دي اوشاعات مغرضة " او " شباب زي الورد واخلاق زي الفل وحاجة مية مية وهي دي مصر بجد " ام عن مشاهد كنس وتنظيف الميدان ام مظاهر التعاون  .. في الحقيقة "اللي عايز يقول من دا كتير " لكن اذا قلته انا مرة ثانية فسيكون جل ما قدمته لك هو تلخيصه في صورة اخري وعلى طريقتي .. ومن هذا الناحية انا اعتقد ان هناك من قدمها افضل مني بكثير .. وفي الحقيقة انا اخاف على تضييع وقتك او على ان "تكروت" مقالتي بسبب انها لا تمثل اية لزمة بالنسبة لك .

 في الحقيقة دار في بالي سؤال .. " هو كان في كام واحد في التحرير " مليون .. تلاتة مليون .. اربعة .. ؟؟ هل يتحمل الميدان هذا العدد .. ؟؟ هل تكذب وسائل الاعلام  !! في الحقيقة لم اجرب ان اعد الناس في ميدان التحرير بنفسي ولم يكن السبب " انهم كتير بالصلاة على النبي " ولكن لم يتسنى لي الوقوف في مكان عالي لاعدهم !! هكذا نبقى دائما الشعب المصري كما نحن .. نبقى داخل صندوق افكارنا .. رافضين الخروج من هذا الصندوق رغم ان هذه الثورة قامت لمحوه اصلا !!

كما انشغلنا وقتها في عد من كان في التحرير لم لا يأتي "محبي العد" ليعدوا لنا كمية الافكار المصرية الرهيبة الفعالة التي راى اصحابها انه حان الوقت ليطلقوا لها العنان لتري حريتها من جديد .. لماذا لا ينشغلون بعدهم وخصوصا انهم لا يحتاجون مكان عالي ليعدوا منه مثلي .. وكلنا نعرف ان هذه الافكار ستتعدى ملايين التحرير بملايين !!

لماذا لا ينشغل المهتمون بـ"الراجل اللي واقف ورا عمر سليمان" ليوضحوا لنا من الذي "وقف وراء" الثورة فعلا وليبذلوا جهدهم لكشف واضح وصحيح لشهداء الثورة الفعليين .. ليقام لهم نصب تذكاري كاقل تقدير لهم .. ولماذا لا ينشغلون -ماهم كتير بقى والبيدج وصلت 100 الف فانز- ليفرزوا لنا قوائم بالذين كانوا "وراء " البلطجة على شباب الثورة في كل شبر في مصر او التحريض ضدهم .. بل لماذا لا ينشغل هؤلاء بالحاجات اللي "وراهم" ويريحونا !!

لماذا لا ينشغل المعجبون بـ"تكتك القذافي" ليفكر في فكرة فعلية يخدم بها وطنه ليمنع نفسه من التورط مستقبلا في شغلانة "سواق تكتك" ويصبح هو والقذافي زمايل مهنة واحدة .. هذا عوضا عن معجبي نضارة القذافي واقوال القذافي ومسرحيات (اللي هيا خطابات) القذافي وملاية القذافي .. حتى وصل بنا الامر الى بيدج بأسم " الراجل اللي جاب المية للقذافي في الخطاب " !!

حقا اننا شعب "فاني" ودمنا خفيف .. وتشهد لنا جميع الشعوب بهذا .. لكن حان الوقت فعلا لنخرج خارج الصندوق .. ونتغير ونحتفظ ايضا بخفة دمنا .. انا لا اطلب ان نعمل في جدية تامة كما كانت تفعل شركة "مرسيدس" حين كان شرطها الاساسي للعاملين هو ان يكون "اخرس" ليعمل في جدية تامة !! ولكني اطلب لنفكر بطريقة مغايرة لما كنا نفكر بها طوال السنين السابقة .

يوميا افتح صفحتي على الفيس لاجد "تلاتشر الف" جروب و"عاشرتشر الف" ايفينت للمطالبة بحقوق .... اقل ما يقال عنها انها حتمية وغاية في الاهمية .. لكن لماذا نصر على البقاء قيد افكارنا القديمة بـالتمسك بلفظ "المطالبة" !! عفوا .. انتا لم تخرج من الصندوق بعد .. وستبقى اسير افكارك لفترة .. ما دمت تضع لفظ المطالبة قبل لفظ التغيير .. غير من نفسك اولا .. حسن ممن حولك .. ابذل اقصى جهدك في ان تؤدي دورك على اكمل وجه في كل ما هو في يدك .. ثم لك الحق بعد ذلك ان "تطالب" بحقك فعلا ..

قد ادرك البعض جزء من التغيير من انفسهم وحولهم فعلا .. لم "يطالبوا" بنظافة الشوارع .. بل راحوا ينظفون الشوارع ويدهنون الارصفة في مشهد اقل ما يقال عن وصفه هو ما قاله الدكتور احمد خالد توفيق بمقاله "عيال تفرح" .. مشهد لا يمثل نظافة ميدانية فقط بل هو فرصة رائعة لتكاتف اهل الحي الواحد والتجمع على فكرة جميلة وحبا في رؤية بلد افضل فعلا .. ولكني آمل الا يكون تغييرا شكليا فحسب .. وان يكون التغيير في كل حياتنا ويبدا من انفسنا اولا لنتعاون فيما بيننا ونمثل منظومة واحدة كما كنا في ميدان التحرير .. وبعدها لن نجد أي عناء في المطالبة بحقوقنا فعلا ولن ننتظر كثيرا لتحقق كما تحقق في ميدان التحرير وسقط مبارك وتبعه شفيق ..

اه .. لقد نسيت ان موضوع المقالة هو تلخيص ما حصل في التحرير .. حسنا اعدكم بان احاول ان اذهب للتحرير في الجمعة القادمة في احتفالية اسقاط شفيق .. هذه المرة سأختار مكان عالى نوعا ما .. لاعد الملايين "بمزاج" !! وان كنت افضل ان اعد مليارات مبارك واعوانه وهي تعود الى خزائن مصر مرة اخرى .. وحينها سيكون بامكاني وبمقدور كل مصري ان ياكل "الكنتاكي" الذي لم تتسنى لي الظروف لاكله في التحرير مسبقا .. الحمد لله .. لم يظهر احد وراء شفيق اثناء خطاب استقالته .. !! لاني كنت سأضطر حينها الى نشر هذه المقالة مرة اخرى ,,

من قلب جمهورية التحرير - الجزء الثاني

في اليوم التاني صحيت الصبح .. حواليا تمارين الصباح شغالة كالعادة .. الكل بيلف حوالين الميدان .. رياضة ونشاط .. لكن انا بقى روحت واخد بعضي وطلعت ع هارديز اخدت فطاري .. طيب وبعدين .. روحت على فنانين الثورة واخدت منهم يافطة وكتبت عليها

- لية تروح المانيا يعالجوك -

-دكاترة الاسنان هيخلعوك-

(ولو متخلعش هنحشيه )

ولفيت بيها ورا كام مظاهرة وقعدت بقى شوية "يسقط مبارك" .. وشوية "ارحل" .. الساعة 11 الضهر طيب وبعدين !! واخر ما زهقت روحت جبت شوية جرايد علشان الفيلا بتاعتنا .. اصل قدام فيلا الشهيد الصاوي عاملين مشروع اسمه اقرا الجرايد مجانا .. كنا بنشتري الجرايد ونحطها قدام الفيلا ( جنب حمام السباحة كدة بالظبط :) ) وتيجي الناس تقرا الجرنال وبعدين تسيبه لغيرها .. علشان كدة كنت دايما تلاقي قدام الفيلا اكتر من 20 شخص ماسكين جرايد ( والثقافة مقطعة بعضها ) .. وفي اخر يومين كمان وسعنا نشاطنا وجاء كاتب كبير معروف وجابلنا كام كتب من تاليفه وموقع عليهم واتبرع بيهم لينا ..

مشروع الجرايد قدام فيلا 1 شارع الشهيد الصاوي

وكمان صاحب الفيلا (عبد الرحمن حبت) كان ماسك اجندة (مش بتاعة عمر سليمان .. لاء الاجندة العادية دي ) وبيخلي أي حد يكتب كلمة للثورة كذكرى .. واتبرع احد الناس انه ياخد الكتاب دا ويطبعه وينشره في كل حتة في الجمهورية .. والناس اللي كانت بتكتب كانوا كتير جدا جدا .. ومنهم صحفيين ومذيعين .. واي حد عادي عايز يكتب حاجة بيكتبها ..

روحت للمستشفى الميداني وكانوا بيدخلوني بكارينة الكلية (مش عارفين اني في اولى ومعرفش أي حاجة في أي حاجة ) والمستشفى عبارة عن زاوية صغير اسمها (عباد الرحمن) واتحولت لمستشفى وعادة بتكون زحمة جدا جدا .. اتكلمت مع دكاترة الاسنان هناك وراقبتهم وهما بيشتغلوا وسألت عن اغرب الحاجات اللي شافوها وكدة ..

في الاول قالولي انهم استقبلوا اكتر من 90 حالة كسر فك !! وكان دايما بيعالجوها عن طريق التثبيت بالسلك واكتر من 50 حالة كسر اسنان عادية دا عوضا عن حالات كتير من الحشو والخلع وكدة .. الغريب انهم لما كانوا بيطلبوا من واحد يطلع ساعتين بس يعمل اشعة اكس راي ويرجع كان بيرفض وكان بيطلب انهم يدولوه مسكن او أي حاجة تخفف الالم علشان ما يسبش التحرير !! ولما تخلص المواجهات مع البلطجية يبقى يشوف فكه المكسور !! دا غير ناس كتير مش عايزة تسيب الميدان وتطلع برة تكشف على اسنانها وبتيجي هنا علشان تعمل حشو او تاخد مسكنات .. والاغلب بيطلب الخلع علشان يقدر يكمل في الميدان وهو واخد راحته من غير أي شكوى !!

وبعدين جاتلي فكرة اني اعمل لقاء مع بعض سكان جمهورية التحرير .. ويمكن هلخص الفكرة في نقط بسيطة

1. اني مكنتش جاي علشان مظاهرات وبس وحسيت لازم اعمل حاجة مختلفة .. فكنت دايما بدخل للسؤال من ناحية ( انه الناس اللي برة التحرير الي انا مسميهم جماهير القناة الاولى والسابعة .. عندهم اعتقاد اننا موقفين حال البلد و انه خلاص طلباتنا استجابت وكدة ) .. علشان امهد لكلامي .. وعشان اوصل رسالة للناس اللي برة الميدان وجهة نظر سكان التحرير .. ودي اول حاجة
2. كنت عايز اعرف هل الناس اللي هنا كانت جاية علشان طلبات لكل واحد فيهم .. ولا كله جاي مصر على (الرحيل) ولية الرحيل مع انه بدأ الاصلاح على حد قول الحكومة ..
3. كنت عايز اعرف هيا الناس اللي هنا جاية فاهمة بتعمل اية .. ولا بتزيط في التزيطة !! يعني زي ما شفنا اكتر من 20 مليون نزلوا يفرحوا في الشوارع لما سقط الرئيس .. بس هل بتوع التحرير جايين علشان الجو في التحرير حلو ولا علشان الكل بيطالب بالرحيل يبقى لازم اطلب معاهم ولا جاي فاهم انه الرحيل معناه اصلاح كامل في مصر .. وانه مش مجرد مطلب والسلام ..

كل الناس ايد واحدة

بسم الله ورقة وقلم وبدات حواراتي ... انا محبتش اذكر اسماء افضل

( خريج الجامعة الالمانية GUC – ستة وعشرين سنة – موظف ادارة مالية – مقيم في الميدان وجيراني )

- انا نفسي يجلي يوم واختار رئيسي بنفسي .. ولما اختار يكون عندي بدائل كتير اختار بينهم

- بس الريس ماشي خلاص بعد ست شهور

- الحكاية مش اشخاص .. الحكاية فكر .. هيمشي وهيجي واحد بنفس الفكر بتاع الحزب الوطني .. يبقى عملت ايه من عندي .. الحزب لسة ماسك وهيفضل ماسك لو مشينا .. وكمان مش ليا انا بس .. للي بعدي .. وللناس اللي برة الميدان .. وعمري ما هندم على اللي انا بعمله ..

( مدير عام بوزارة العدل – محال على المعاش – غير مقيم بس جايب بنته وزوجته )

- مصلحة البلد كلها هنا .. دول بيعملوا لمصلحة البلد .. هنا الخير لمصر .. وبس

- طيب واللي بتقوله الحكومة

- يقولوا اية ..!! طيب انا شاركت في حرب اكتوبر ..وكنت على خط من خطوط الجيش .. وبعدين كفاية دول ناس كانوا بيطلعوا على قفانا مستحيل يجي يوم يفكروا في مصلحتنا ..

- واللي بيقولوا اننا موقفين حال البلد

- ناس جاهلة .. !! اه والله تيجي وتشوف .. دا الرئيس دخل المئوية مع الزمالك !!!

( طالب بتالتة اداب القاهرة – مقيم في الميدان )

- دا رفع الظلم عن النفس .. دا واجب علينا كلنا .. بص .. انا مش عيب اني اكون فقير .. بس من حقي اعرف سبب الفقر بتاعي .. !!

- طيب وتوقيف حال البلد

- مفيش حلاوة من غير نار .. وبعدين متجيش فرصة اخلى بلادي احسن واغنى واقول لاء .. لازم نصبر ونكمل المشوار .. وعلى راي الشاعر

واصبر لكل مصيبة وتجلدَ

واعلم بان المرء غير مخلدِ

واصبر كما صبر الكرام فانه

كربات تجئ اليوم تكشف في غدِ

وكمان احنا هنا على الحق .. وهما على الباطل .. شوفت البلطجية اللي بعتوها علينا .. اكيد الواحد فيهم هو الفتوة في حتته .. لكن هنا كان بيطلعله الاطفال يصدوه وكان بيخاف منهم .. لانه البلطجي طالع للفلوس .. احنا طالعين لحقنا .. للحرية .. الطفل دا ممكن يموت .. وفي طفل فعلا اخد رصاصة في راسه .. بس دا لاننا عندنا مبدأ وثابتين .. انتا لو حطيت الموت والفلوس في ميزان .. هترجح كفة الموت وعلشان كدة البلطجي بيهرب .. لكن لو حطيت الموت والحرية في ميزان .. هترجح كفة الحرية .. علشان كدة احنا قاعدين ..

- بيقولوا الريس مكنش يعرف حاجة واللي حواليه هما السبب

- اي حد يقول انه الريس مكنش يعرف اللي بيحصل .. اقوله طيب يبقى رئيس زي دا غير موفق في مكانه .. ويرحل .. دي ابسط حاجة

- أي رايك في الاعلام المصري

- قصدك الاعتام والتعتيم المصري .. في شاعر اسمه ( عبد العزيز البشري ) قال

وكم ذا بمصر من المضحكات .. ولكنه ضحك كالبكاء ..

( محامي خريج 2001 – ومتوظف من شهور – مقيم هو وزوجته وابنيه )

- الحكاية مش فيه هوا .. الحكاية في سياسته .. اشخاصه هو والحزن ( بالنون ) الحزن الوثني .. احنا عارفين وهما عارفين عايزين اية كويس .. اسقاط نظام مبارك .. دي اهم حاجة .. هما ممشيينا باسلوب ( جوعع كلبك يمشي وراك ) ... انا مرتبي 2200 بس مش دي مش كل حاجة .. هو لو غلط مش يعترف بالغلط ؟ طيب يحاسب اللي غلط ؟؟ دا قطع النت والاتصالات خلى الدولة تخسر مليارات بايده .. وثروة احمد عز تضاعفت 300 ضعف !!

- لية الرحيل ؟

- لانه دا كله مش هيتحاكم ولا هيحصل حاجة طول ما هو موجود .. ودي حاجة معروفة .. طيب بص انا جايب ابراهيم ابني اهو .. خد يا هيما .. قول كدة لعمو احنا جاين هنا لية ..

- الشعب يريد اثقاط النزام

في طفل كان ماسك لوحة مكتوب عليها : يا مبارك انا طفل ونزلت اطلب بحقي في ميدان التحرير .. لو كنت راجل انزل شوف الشعب عايز اية في ميدان التحرير

( طالب بكلية الطب سوهاج – سنة خامسة )

- دا رأس الفساد .. والنظام كله هيقع وهتتكشف كل حاجة لو مشي .. بيقولنا فاض بيه الكيل .. احنا فاض بينا الكيل بصراحة .. وكمان نصف ثورة تعني كفن شعب .. والضربة اللي ما تكسرش تقوي .. ومفيش أي ثقة حاليا بيننا وبينهم .. الناس اللي في التحرير في وادي والحكومة في وادي تاني خالص .. وان شاء الله هيسقط النظام

وللحوار بقية .. في الجزء التالت والاخير